Posted by Otgoo.J on October 16, 2014 in зөн билэг, оюун санааны ертөнц, судалгаа
Ертөнцийг танихын төлөө хийсэн хүний оролдлого олон нээлтийг авчирсан хэдий ч өнөө хэр тайлж уншиж чадаагүй зүйл цөөнгүй байдгийн нэг бол зүүд. Эрт галавын үеэс хүн төрөлхтөний сонирхлыг татсаар ирсэн зүүд болоод сэтгэл оюуны үзэгдлийн зарим нэг нууцад нэвтрэх гэсэн судлаачдын оролдлогууд тодорхой хүрээнд хариултыг олсоор ирсэн ч бүрэн тайлалыг одоогоор хэн ч хийгээгүй хэвээр байна. Тийнхүү цаашлах тусам сонирхол татсаар, тайлагдашгүй байх тусмаа илүү ээдрээтэй олон таамаг, үзэл онолыг сөргөлдүүлэх талбар болсоор ирэв. Зүүд, түүн доторхи ирээдүй рүү, ирэх цаг руу хандсан мэдээллийг агуулдаг чанар нь уран зохиолд онцгой нэгэн судлагдахуун болсоор.
Уран зохиолд зүүд, далд ертөнцийн элдэв тайлагдашгүйн нууцыг зохиолч зөн мэдрэмжээрээ онож мэдснээ бүтээл болгох агаад тэнд тухайн ард түмний сүсэг бишрэл, итгэл үнэмшлийн суурь нь давхар агуулагдаж байдаг. Юуг үнэн гэж чин сэтгэлээсээ итгэж дагаж мөрдөнө тэр л үнэн болж батлагдах магадлалтай.
Ямар ч үндэс угсаатан бай хамаагүй, ерөөсөө хүний бурханд сүслэх итгэл бишрэлийн үндэс нь угтаа нэг юм, (“The mind is the central part of the human soul, or the core of the spiritual body” [1]) сүслэх бишрэх, итгэх үнэмших гол процесс бидний бодолд (сэтгэлд) өрнөдөг, “бодол бол сүнсний гол цөм нь” гэж Японы Happy Science (буддизмд суурилсан хүн төрөлхтний нэгдмэл шашны тухай номлодог ) байгууллагын тэргүүн, доктор Рьюхо Окава бичжээ. Одоогоор түүний бичсэн ном дэлхий олон оронд хэвлэгдэж олон сая уншигчдад буддизмыг ойлгоход тусалж байгаа гэж хэлж болно.
Үндэстэн угсаатны арьс өнгө, шашин шүтлэгээс үл хамаарч эрт цагаас бүгд л ид шид, дээд тэнгэр, далдын хүчинд итгэсээр ирсэн. Зүүдэнд ирээдүйн тухай дохио мэдээ агуулагддаг гэсэн их эртнээс улбаатай энэхүү итгэл үнэмшил өнөө хүртэл хадгалагдсаар байна.
Одоогоос 100 гаруй жилийн өмнө еврей гаралтай, сэтгэцийн эмгэг судлаач эмч Зигмунд Фройд (1865оны 5 сарын 6нд Австрийн Фрейбэргт төржээ) хүний сэтгэцийн олон үйлдлийг судалж тайлбарласнаар “психоанализ”-ийн бие даасан шинжлэх ухааны суурийг тавьсан бөгөөд түүний бүтээлийн нэгэн томоохон хэсэг нь зүүдний тухай судалгаа байв.
Сэтгэл судлалын шинжлэх ухааны эцэг Зигмунд Фройдын сэтгэл зүйн болоод зүүдний тухай онол таамгууд нь ихээхэн маргаан шүүмж дагуулдаг ч сэтгэц судлалын шинжлэх ухаанд олон онол нь батлагддаг гэж үздэг.
Зүүдний онол бол сэтгэцийн олон өнгө, шинж чанарыг агуулсан, сэтгэл судлалын шинжлэх ухааны ганц өвөрмөц аспект бөгөөд “бидний өмнө хуримтлуулсан мэдлэгтэй огт адилгүй, мухар ид шидийн ойлголтын хил хязгаараас давсан өөр шинэ орон зай” [2] З.Фройд хэлжээ. Сэтгэл судлалын шинжлэх ухаанд Фройдын үлдээсэн гол ололт нь хүний сэтгэлийн олон янз байдал, шинж чанар түүний нууцыг тайлахад зүүд судлал чухал болохыг нээж, зөн билэг зүүдний тухай ойлголтыг анх удаа шинжлэх ухааны үүднээс тайлбарласнаараа алдартай юм. Энэ нь түүнийг зөвхөн сэтгэцийн эмгэг судлаач эмч төдийгүй, хүн төрөлхтөний эртнээс нааш танин мэдэхийг хүссэн зөн совин далд ертөнцийн тухай ойлголтыг гүнзгийрүүлэн судлах сонирхлыг өдөөж, улмаар шашин соёл, урлаг уран зохиолын шүүмж судлалын салбарт хүртэл нэрийг дурьдах хэрэгтэй чухал хүн болгосон байдаг.
Тэгэхлээр, сэтгэл судлалын шинжлэх ухааны нэгэн чухал судлагдахуун болсон зүүдийг утга зохиолд хэрхэн хэрэглэсэн, түүнийг яаж тайлбарлах нь бас нэгэн сонирхолтой сэдэв. Ингээд, Фройдын зүүдний онол, уран зохиолд түүнийг хэрхэн хэрэглэсэнийг зөвхөн нэг бүтээл дээр тайлбарлахыг хичээлээ.
Зүүдний тухай З.Фройдын онол ба уран зохиол дахь зүүд
“Зүүд бол ухамсаргүйн тухай мэдлэгт хөтлөх үнэн зөв зам юм”[3]гэх Фройдын алдартай үг зүүдний утгыг тайлах гэсэн хүн төрөлхний хүслийг зөв чигт залсан гэж үздэг. Зигмунд Фройд эл үгнээсээ үүдэн зүүдний талаарх таамаг дэвшүүлж, онол болгон хөгжүүлжээ. Тэр 1895 оноос зүүдэнд олон талаас нь анализ хийж баримтжуулсаар, 1900 онд “Зүүдний тайлбар” нэртэйгээр хэвлэсэн нь өнөө хүртэл эрдэмтэд судлаачдын тал талаас хэмлэж, “ноцож ноолох” дуртай тулгуур онол болжээ.
1900 онд дэвшүүлсэн зүүдний талаарх санаагаа баяжуулж 1932 онд Сэтгэц судлалын шинэ танилцуулга лекц дээрээ “сэтгэц судлалын шинжлэх ухаанд онцгой байр эзлэх болсон зүүдний анализ нь сэтгэцийн эмгэгийг эмчлэх арга ажиллагаанаас сэтгэцийн шинжлэх ухаан гүнзгий судлал руу шилжих”-д тусална гэж тэмдэглэжээ.
З.Фройд “бидний өвөг дээдэс 3000 жилийн өмнө бас яг бидэн шиг зүүдэлдэг, тэгэхдээ тэр цагт ард түмнүүд зүүдний учир холбогдолыг онцгойд үзэж, ирээдүйд биелэлээ олох зөн билгийн дохио гэж үзэж түүнээс утга учрыг нь айдаг байсан” гэж тэмдэглээд өөрийнхөө амьдралын чухал үеүдэд зүүдлэгдсэн зүүдээ шинжиж, тэдгээрийг шинжлэх ухаанчаар тайлахыг хичээсэн оролдлого нь өнөө хүртэл сонирхолтой судлагдахуун хэвээр үлдсэн юм.
Эртний Грекчүүд, мөн Ойрхи ба Дундуд Азийн ард түмэн зүүд тайлбарлагчгүйгээр аян дайнд мордох нь үгүй байж. Энэ нь одоогийнхоор агаараас тандан судлаач юм уу эсвэл тагнуул туршуул хйилгүйгээр дайнд орохтой л адилд үздэг гэнэ. Жишээ нь, Александр Македонский аян дайнд явахдаа армийнхаа бүрэлдэхүүнд хамгийн сайн зүүд тайлагчийг заавал оруулдаг байжээ. Тир нэртэй арлын нэгэн хот эзлэхээр довтолсон Македонскийн цэргүүд арлынхны хүчтэй эсэргүүцтэй тулгарсан тул хаан бүслэлтээ зогсоодог ч юм билүү гэж бодож байж. Гэтэл нэгэн шөнө тэрбээр зүүдэндээ ёслолын өргөөнөө эмс охид бүжиглэж буйг үзээд зөнчдөө хэлбэл, бүслэгдсэн хотыг эзэлж, ялалт таны талд ирэхийг зөгнөжээ гэсэн байна. Ийнхүү тэрээр итгэлтэйгээр Тир хотын зүг цэргээ хөдөлгөж, буулган авчээ. Уранзохиолд энэ асуудал өнөө хүртэл үнэ цэнтэй хэвээр байгаа” [4] гэж Фройд одоогоос 100 гаруй жилийн өмнө бичиж байв.
“З.Фрейдийн үзлээр бол бидний далд ухамсарт өртсөн мэдээллүүд бодолд хэлбэржин зүүдийг үүсгэдэг гэнэ. Бидний мэдрэлийн эсүүд зогсоо зайгүй ажилладаг агаад тэдний үүрэг нь мэдээллийг хүлээж авах, боловсруулах, хадгалах, хэрэгтэй үед эргэн гаргахыг нь ой тогтоолт, харин ийш тийш нь хуваарилж ажиллуулахыг удирдах үүрэг гэдэг аж. Хүний тархинд хуримтлагдсан мэдээлэл устаж алга болдоггүй (мартдаггүй) гэх ба гагцхүү мэдээллийг хадгалагч эсүүд нь зүгээр хэрэгтэй үеэ хүлээгээд унтаж байдаг. Гэвч хэрэгтэй үед санаанд орж ирдэггүй мөртлөө хэзээ хойно санах нь ч бий. Унтаж байхдаа ч хоорондоо байнгын мэдээлэл солилцож, ямар нэгэн бүтэх бүтэхгүй төлөвлөгөө зохиож байдаг …Бидний мэдэх зөн совин, ирээдүйг урьчилан харах зэрэг үзэгдэл нь тархинд хуримтлагдаж, боловсруулсан мэдээллийг магадлалын онолын үүднээс толилуулж байгаа хэрэг юм [5] гэж тайлбарладаг
Тэгвэл уран зохиолд Фройдын сэтгэц задлагийн онол, зүүдний тайлбар яагаад чухал болов гэдэг асуулт гарна. Зохиолчийн өгүүлсэн санаа, зохиолын баатарын зан авир, үг хэл үйлдэл, бодол санааг сэтгэц задлагийн онолоор (психоанализ) тайлбарлаж дүрийн сэтгэлгээний хэв маягийг тодорхойлох нь илүү нарийн түвэгтэй ажил. Мэдээж, уран зохиол дахь зүүд ч мөн бидэнд өдөр тутам тохиолддог сонин хачин, онцгой бас ойлгомжгүй үзэгдлийн нэг мөн.
Зүүд судлаач Оросын астрологич Владимир Логинов: “Зүүд бол яг жүжиг шиг”[6] гээд зүүдийг “тайз буюу үзэгдэл”, “жүжигчин”, “үйл явдал” гэж хуваагаад үйл явдлыг дотор нь төрөл жанраар ангилж, мөн сар нар, гариг эрхэс оддын байрлал хөдөлгөөнийг тооцоолон кодлосон байдаг.
Сэтгэл судлал болон астрологийн чухал судлагдахуун болсон зүүдийг уран зохиолд яаж үздэг бол? Уран зохиол судлалд хэлний тухай эхлээд яригдана. Дараа нь сэтгэлгээний болоод сэтгэлзүйн асуудал, төгсгөлд нь нийгмийн болоод соёлын тухай тодорхойлолт орж ирнэ. Ярих санаа нь хэлээр тодорхойлогддог, харин уран зохиол бол яриаг сэтгэлзүйн үүднээс бодож тодорхойлж буй хэлбэр [7] гээд орчин үеийн утга зохиолын онолд сэтгэл оюун, ухамсар ба ухамсаргүйн хоорондын холбоо харилцаа гэсэн нэр томьёо танил болсоныг (Jacques Lacan,Peter Brooks) дурьджээ. Судлаачид ямартай ч ухамсар ба ухамсаргүйн хооронд холбоо оршин буй гэдэг дээр санал нэгдэж “ухамсаргүй бол яг л хэл шиг бүтэц эрэмбэтэй байдаг” гэсэн судлаач Jacques Lacan-ы томьёоллыг онцолжээ.
Зохиолын хэл, тэнд гарч буй дүрүүдийн бодол сэтгэлгээг ойлгохын тул сэтгэл судлал дахь Фройдын онолыг мэдэх хэрэгтэй болдог.
Фройд зүүдэнд condensation буюу нягт (товч) мэдээлэл, displacement- орлуулалт гэсэн хоёр гол механизм байдаг[8] гэж үзсэн. Товч өгүүлэмжээс зүүдний гол симболыг хайж маш сайн шинжилж үзэх хэрэгтэй юм. Зүүдний гол санаа нь хүний хүслийн илэрхийлэл мөн боловч яг тэр хүсэл нь биш харин өөр санаа, өөр дүр дүрслэл, өөр үйл явдалд шилжүүлж орлуулсан байдаг гэжээ. Зүүдэнд ирж буй цогц (бөөн, цул ч гэх юм уу) мэдээлэл дунд янз бүрийн өөр дүрслэл, өөр юмс орж гарч байдагийг л орлуулалт, шилжүүлэлт гээд байх шиг.
Tэгэхээр displacement буюу шилжилт, орлуулалт гэдэг нь зүүдэнд дэх үйл явдал түр саатсан буюу эсвэл чиглэлээ өөрчилсөн тухай ойлголт, харин condensation буюу нягтрал (товч мэдээ)-ын тухайд бол тэндээс гол санааг шүүж авах гэсэн ойлголт бололтой.
Фройд зүүдийг шинжин судалж 1905 хэвлэсэн номондоо: “ зүүдэн дэх этгээд сонин илэрхийлэл нь тухайн үйл явдал зэрэгцэн оршихын хамт, бас өөр нэгэн үйл явдалд нэгэн зэрэг нөлөө үзүүлээд байх шиг санагддаг ” [9] гэж тэмдэглэжээ. Тэгэхээр энэ нь зүүдэн дэх явдал тухайн хүний амьдрал, ирээдүй хийгээд өнгөрсөнтэй ямар нэг байдлаар холбоотой, эсвэл одоо үетэй нь зэрэгцэн оршиж, мөн амьдралд нь ямар нэг хэлбэрээр нөлөөлдөг байж мэдэх ч юм шиг.
Уран зохиолд дээрх санааг авч, нягтрал ба орлуулалт гэсэн ойлголт нь metaphor –зүйрлэл, metonymy-солин нэрлэхүй гэсэн нэр томьёотой холбогдож болно гэж үзсэн байна. Өөрөөр хэлбэл, condensation-нягтрал нь metaphorical буюу зүйрлэлийн шинжтэй, харин displacement-шилжилт, орлуулалт нь metonymic буюу солин нэрлэхүйтэй тохирно гэж үзээд цааш нь зүйрлэл солин нэрлэхүй хоёр зэрэгцэн оршиж болно, зохиолын далд утгыг тайлах нь зүүдний нууцыг тайлахтай адил гэж үзжээ.
Зүүд ба зохиол аль аль нь зөвхөн хүслийг илэрхийлээд зогсдог бус, мөн тэрхүү хүслийн хүлээлт (саатал гэмээр юм уу) үүсгэж байдаг. Бид заримдаа шөнөжингөө зүүдэлсэн урт зүүднээс сэрмэгцээ “энэ чинь жинхэнэ биш байж шүү дээ” гэж бодсон хэдий ч мөнөөх зүүднийхээ айдастай буюу эсвэл тааламжтай мэдрэмжээс салж чадахгүй байх нь бий. Хүний зүүдийг бодвол уран зохиол дахь зүүд арай өөрөөр үргэлжилнэ. Уран зохиол дахь зүүдний давуу тал бол урлаг, энэ нь өөрийн бүтэцтэй агаад тэр нь хүний жинхэнэ зүүдний процессийг төлөөлдөг. Өөрөөр хэлбэр “урлаг дахь зүүд нь өөрийн бүтэцтэй тул хүссэн үедээ саатуулж зогсоож болдог ба тэр нь тийм төвөгтэй байдаггүй[10].
Зүүдний онолыг уран зохиолын онолтой харьцуулсан эрдэмтэн судлаачид ийм дүгнэлтүүд хийжээ. Тэгвэл миний энэ ажлын зорилго нь уран зохиол дахь зүүдийг шинжих, үүний тулд тодорхой нэг бүтээлээс зүүдийг ялган авч түүн тайлбар хийх явдал билээ. Ийм ажлыг урьд нь хэн нэг нь хийж байсан эсэхийг тандаж үзээгүй нь миний сул тал тул хүлцэл өчиж байна.
Г.Аюурзаны Шүгдэн роман дахь зүүд
Шүгдэн зохиолын нэгэн өвөрмөц өгүүлэмж бол зүүд. Зохиолын эхнээс л гарна. Өвөрмонголын цагдаа Сэржамцын зүүд юу өгүүлэв. Нохой үхэх агшиндаа эзэндээ зүүдээр дамжуулан мэдээлэл өгөв үү? Зохиолд гарч буй зүүдний сонин үзэгдэл, далд өгүүлэмж бол угтаа зохиолчийн өөрийнх нь зүүд, эсвэл бодож олсон өөр хэн ч амар тайлахааргүй тийм л зүйл. Зүүдний зөрчлийг тайлах нь зохиолчийн ажил биш, зүүдээр дамжуулан сэдэл санаа өгөх нь харин түүний ажил юм.
Зохиолд зүүд гэмээр дүрслэлтэй, сүнсний ертөнцийн үйл явдал ч бас жичдээ нэгэн судлагдахуун байж болмоор санагдав.
Сэржамцын алдарт мөрч нохой учир битүүлгээр үхэх тэр л агшин зүүдлэгдсэн зүүдийг эхлээд авч үзье.
Зүүд №1…Буутай цэргүүд эгнэн жагсчихсан өмнүүр нь алтан саатай мөрдөс бүхий генерал өмднийхөө халаасанд гараа шургуулаад таахалзан алхаж байх агаад нэг цэрэг мөнөөх генерал руу гүйж ирээд “хүүрийг булах уу даргаа ?” [11]… энэ л агшинд нохой гасалж түүнийг сэрээнэ.
Тайлбар: Зүүдний тухай онолд дурьдсанчлан, энэ зүүдэнд ямар нэгэн орлуулсан санаа байна гэж үзэж болохоор. Хэн нэгний хүүр булах тухай яриа энд болдог нь бас сонин. Хүүр нь үхлийг төлөөлж, цэргүүд жагсаад даргадаа илтгэж байгаа нь нохойг хөнөөсөн үйл ажиллагааг далдуур төлөөлсөн байж болох мэт. Түүнчлэн, зохиолч магадгүй дээр дурьдсан, зүүдний ертөнц ба хүний ертөнцтэй зэрэгцээ оршиж, үйл явдал нь ч мөн нэгэн цагт өрнөдөг байж болно гэсэн санааг сэм өгүүлсэн гэмээр.
Зүүд №2 …эгнэн жагссан цэргүүд Жангарч өвөөг нь буудан алж байх юм гэнэ. Цэргүүдийн эхэнд алтан мөрдөс бүхий хятад генерал зогсоно. Нэг цэрэг түүн руу гүйж ирээд “хүүрийг булах уу даргаа?” хэмээн асууж байна. “” Зүгээр л булсан зүйлийг хүмүүс хэзээд олдог, Тэгээд ч нүүдэлчид газрын шинэхэн сорвийг анддаггүй улс, буцааж гаргаж ирээд амилуулчихна” гэж генерал хэлж байна. “Тэгээд яах вэ даргаа, Шармөрөнд живүүлчих юм уу? Живүүлнэ ээ, гэхдээ өөр мөрөнд” гээд генерал хоржоонтойгоор инээмсэглэв. “Тэд юунд дургүй, юунд ойртож чаддаггүй билээ? Бид юугаар баян билээ?” “Жорлон ухуул, тэгээд хүзүүнд нь томхон чулуу уяад хаячих. Бүх цэргийг, бас ойролцоох тосгоныхныг дайчилж долоо хоногийн турш баалга. Арван тосгоныхон шиг олон хүн нэг дор баахыг тэд хэзээ ч үзээгүй тул жангарчийнхаа цогцосыг яагаад ч ухаж авч чадахгүй Нохдынхоо оронд жинхэнэ чоно авчраа шиншүүллээ ч түүний хаана байгааг олохгүй” Цэрэг нь ёсолсноо “Даргаа, одоо чинь тариачдын ид бордооны цаг шүү дээ…”[12]
Тайлбар: Дахин нөгөө л зүүдээ үргэлжлүүлж байна. Хэрвээ зүүд хүслийн илэрхийлэл болдог, далд санааг илрүүлдэг гэж үзвэл, энэ зүүд зохиолын гүн утга[13] агуулагдсан гэж үзэх боломжтой. Өөрөөр хэлбэл, эл зүүднээс үүтгэгдсэн Сэржамцын сэрэхүй нь зохиолын далд утгыг өгүүлэн тайлах ба энэ нь өвөрмонголын ард түмний зүрх сэтгэлд нууцхан хадгалагддаг эрх чөлөөний төлөөх эрмэлзэл, өнгөрсөн түүхийн гашуун дурсамжинд тээгдсэн үндэстний оюун санааны бухимдал нь ийнхүү зүүдээр дамжин илэрчээ. Жангарч өвөөгөөр нь элч болгон зүүдэнд нь ирж буй мэдээлэл бол, энэ үеийг хүртэл үүх түүхээ тэр болгон сөхөж дурсаж байгаагүй жирийн нэгэн цагдаад өнгөрсөн үе өвөг дээдсийнхээ баатарлаг түүхийг судлах, санах сэрэх сэдлийг өгсөн байх магадлалтай.
Зүүд №3 …Саманд үүр хаяарахын хэрд түр дуг хийхдээ зэрлэг сарлагт хөөгдөж байна гэж хар дараад сэрчихэв. …сүүлээ агсаж нүдээ улаанаар эргэлдүүлсэн аварга том тэр хоёр хар бух таарсан бүхнээ эврээрээ сүлбэхэд бэлэн хаагчин давхиж явсныг яана![14]
Тайлбар: Саманд зүүдээ багшаасаа асуудаг. Сэрдог гэгээн, хавар намрын зүүд хамаагүй, газар гэсэх, гол хаяалахыг дагаад хүний сэтгэл үймэрдэг… гэж тайлбарлана. Дэлхий улс үндэстэн болгонд зүүд тайлагч гэж эртнээс нааш байсан гэдэг. Харин монголчуудын хувьд шашны номд нэвтэрсэн хутагт гэгээнтнүүд энэ үүргийг хүлээдэг байсан бөгөөд тэд зүүдийг байгаль цаг улирал, нутаг ус, хүний сэтгэлийн байдалтай холбон тайлбарладаг нь бараг л барууны сэтгэл судлалын онолтой дөхөж очдог. Тухайлбал, энд Сэрдог гэгээн Самандад хандан: “Чамайг хоёр сарлагийн бух хөөж л явна.Сэтгэлд чинь чамайг сүлбэх амьтан угаасаа тоо томшгүй бий. Сэтгэлээ аргална уу гэхээс тэднийг аргалах гэж үгүй ээ” гэнэ. Энэ нь хэдийгээр сэтгэлийн гэмийг арилгах тухай буддын номлол гэж харагдах боловч сэтгэлзүйчдийн “сэтгэлээ тайван байлга…эмоцоо дарж бай” гэдэгтэй угтаа бол нэг юм.
Өөр нэг зүйл: Сарлагийн эврээр хийсэн халбагыг Саманд гэнэт санадаг. Харин зохиолч зүүдэн дэх сарлагийн бухыг эмэгтэй хүний илбэ жатга мэт өгүүлсэн нь хачин. Эртний зарим судар дахь зүүдний тайлалд бол “(бух) үхэрт мөргүүлэв, өмнө хойно орон гүйв гэвэл ноён хүн уруудах, эгэл хүн бол өвчин тусахын ёр[15] хэмээн тайлбарласан буйг дашрамд дурьдахыг хүсэв. Эш болгосон судрын тайлалд өгүүлснээс харахад Самандын зүүд түүний эмгэнэлт үхлийг зөгнөсөн ч байж мэднэ. Магадгүй, зохиолч энэ зүүдийг санаандгүйгээр бодож олоогүй байх.
Зүүд мэт жишээ №4. ( энд зүүд ч гэмээр бас бодол ч гэмээр сонин санааг зохиолч ингэж илэрхийлжээ.) Сэржамц…шөнө унтаж байтал нойрон дунд нь нэг содон зүйл санаад ороод, арайхийн өндийтөл яг юу санасан нь мартагдчихав. Гэлээ ч тэр л санагдаад байсан зүйлийн ул мөр энүүхэнд, цээжнийх нь бүр наана, бараг л гараа хоолой руугаа дүрчихвэл бариад авч болмоор сэрвэлзэн, загатнах мэт эрвэгнэнэ. “Ээ чааваас юу бодогдчихов оо? Их л үнэмшилтэй санаа байсан… олооч ээ, санагдаад өгөөч!.. аа тийм нохойны нарийвчилсан шинжилгээ…хөөе…. эзэн нь өөрөө алуурчин байвал…”[16]
Тайлбар: Унтаа сэрүүнийг заагт бодогдсон ч юм уу зүүдлэгдсэн эл үзэгдлийг зохиолч гайхмаар үнэмшилтэй барим тавим илэрхийлсэн. Үнэндээ яг иймэрэхүү нөхцөл байдлыг хүн заримдаа мэдэрдэг ч ийнхүү үгээр илэрхийлэх нь байтугай, сэргээн санах гээд чадахгүй үе олонтаа. Яг энэ тухай Фройд зүүдний тухай лекцдээ:“Зарим зүүдний санаа нүднээ харагдаж, сэтгэлд бууж, бие эрхтэнд ямар нэг байдлаар мэдрэгдээд байгаа хэдий ч үгээр буулган илэрхийлэх боломжгүй байдаг. Би тийм зүүдийг үгээр илэрхийлж чадахгүй ч харин зурчихаж чадах юм шиг санагддаг…Энэ талаар Г.Т.Фехнер [28] зүүд өрнөж буй тэр байрлал (сэтгэл дэх) бол сэрүүн байх үедээ бидний төсөөлөлд оршдог тийм газар биш юм гэж хэлсэн”[17]гэдгийг онцолжээ. Тэгэхээр зохиолчийн бичвэртээ ашигласан зүүд, Фройдын хэлсэнтэй яг ижил байна. Яг санах гээд байгаа атлаа санаандаа байгааг тодорхой хэлж болдоггүй, эсвэл биеийн хаа нэгтээ загатнаад байх шиг атлаа яг тэнд нь маажих гэхээр тэр нь бас л биш, огт өөр, биеийн хаа нэгтээ бүүр гүнд нь мэдрэгдээд байгаа юм шиг нэг тийм сонин мэдрэмж бидэнд заримдаа төрдөггүй гэж үү?. Зохиолчийн илэрхийлсэн энэ санаа бол яг тэр л мэдрэмж агаад Фройд үүнтэй холбоотой байж мэдмээр нэгэн тодорхойлолт хэлсэн нь: “Хэрэв ингэж сэтгэцийн ойлгомжгүй элементүүдийг зохиолч, далдыг ертөнцийг мэдрэгч зөн билэгтэн, бусад үл тайлбарлагдах нууцын судлалд хамруулж байгаа нь энэ ерөөсөө л шинжлэх ухаанаар тайлбарлаж чадахгүй ч оршин буйг нь нотолсоор байгаа зүйлийн нэг юм”[18] гэсэн. Тэгэхлээр нэг юм оршиж буй нь үнэн гэдгийг хэлчихэж.
Дашрамд тэмдэглэхэд судалгаанд сонгож ашигласан дээрх зүүднүүд бүгд ямар нэгэн байдлаар үхэлтэй холбогддог. Мөрч нохойг хэн нэг нь хордуулж алсан, соёлын хувьсгалын үед хэлмэгдсэн өвөө, эсвэл Саманд ламын үхлийг зөгнөсөн гэх мэт. Зөвхөн энэ зохиолд ч бус ерөөсөө үхэл бол уран зохиолын нэгэн гол сэдэв байдаг. Яагаад? Энд философийн элдэв тайлбар хийлгүй, зөвхөн Фройдын нэгэн тодорхойлолтыг авч үзье.
“….ертөнцийн бүхий л амьд амьтан (органик амьдрал)-ын хүсэл бол ерөнхийдөө амар амгалан (хөдөлгөөнгүй) буюу органик бус байдалдаа буцаж орох явдал.” “Энэ утгаараа бүхий л амьдралын зорилго бол үхэл. Өөрөөр хэлбэр, “амьтай бүхэн зөвхөн өөрийн жамаар үхэхийг хүсдэг”[19] гэжээ. Үүнийг судлаачид зоригтой томьёололд тооцогддог. Эл онолын гол ээдрээ нь үхэл, секс хоёрыг салгахуйяа бэрх хэмээн үзсэнд оршино. Өөрөөр хэлбэл, өдөөгдсөн сэрлийг намжаана гэдэг нь таашаалын зарчим ямар нэг хэлбэрээр үйлчилж буйг илтгэдэг. Бэлгийн үйл ажиллагааны зорилго бол үүссэн сэрлийг бууруулах хүсэл юм. З.Фройдын гаргалгааны зоримог тал нь үхлийн зорилго мөн үүнтэй адил гэж үзсэнд оршино. Уран зохиол дахь үхлийн агшин бэлгийн харилцааны янз бүрийн сэжим өдөөлтөөс үүтгэлтэй байх нь түгээмэл. З.Фройд “бэлгийн дур хүсэл, үхэл хоёрийг салгаж ойлгоход хэцүү гэдгийг хэлэхээр зэхэж байтал яруу найрагчид түрүүлээд хэлчихдэг”хэмээн хошигносон нь бий.
Харин дээр иш болгосон зохиол бэлгийн харилцаанаас үүтгэлтэй “үхэл”ийг өгүүлээгүй харин ертөнцийн хүний хүсэл шунал материаллаг эд баялаг руу шилжсэнээр хүн өөрийгөө болоод өрөөлийг хөнөөн байж санаа амарч буйг л харуулна.
Дүгнэлт
Зүүдний онолоос эхэлсэн ажил маань эцэстээ үхлийн тухай тайлбараар өндөрлөж байна. Сэтгэл шинжээч, эмч З.Фройдын судалгаа сэтгэл мэдрэлийн өвчнийг анагаахад чиглэж байсан ч гүнзгийрэх тусам өргөжин тэлсээр зүүд, далд ухамсар гэх мэт шинжлэх ухаанаар эс тайлбарлагдах түвэгтэй үзэгдлийн судалгааны хүрээ рүү татан оруулж, хам цогцоор тайлбарлах, өөр хоорондоо уялдаатай олон асуудал сэдэвийг хамрах болжээ.
Зигмунд Фройд психоанализийн удиртгал лекцийнхээ дундуур анагаах ухаанд сэтгэцийн өвчнийг судлахдаа хэрхэн ханддаг тухай: “… бид бие организмын физик химийн шинжийг нь илүү авч үзэхээс, сэтгэлийн талаас шинжсэн судалгаанд үл итгэх нь олонтаа агаад түүнийг мэргэжлийн бус, натур гүн ухааны, нууцлаг шинжтэй, зохиолчид, зөнчдөд илүү хамааралтай гэж үздэг” хэмээн өөрийн судалгааны хэцүү болоод шинэлэг талыг тодорхойлжээ.
Нэгэнт өнөөгийн тогтсон таалал бүхий шинжлэх ухаанаар тайлбарлагдахгүй зүүд зөн билгийн талаасаа яригдах эл онолын асуудлыг 20-р зууны урлаг, уран зохиол, астрологи, шашин судлалын олон салбарт өргөнөөр хэлэлцэж, үр дүнг нь ашиглах болов. Ялангуяа сүүлийн 2О-иод жил дэлхийн кино урлаг, уран зохиолын гол өгүүлэмж энэ тал руугаа явж, түүний мөрөөр психоанализын салбар бодот амьдралтай улам ойртож, арга зүйн чухал үүрэг гүйцэтгэж байгааг анзаарахгүй байхын аргагүй юм.
Сонирхолтой өгүүлэмжийг төрүүлдэг зүүдний нууцлаг, совинлог зохиолууд сүүлийн үеийн уншигчдын ихээхэн эрэлттэй сэдэв болоод байгаа.
Зөн мэдрэмжээ хэрхэн таних, яаж илэрхийлэх тухайн урлаачийн оюуны чадамж, ойлголтын түвшин ухамсарлахуйн цараанаас шалтгаалж сайн муу янз бүрийн л бүтээл гарсаар байна.
Энд сонгосон Шүгдэн роман бол зохиолчийн сэтгэлийн гүнд боловсорсон, ялангуяа, зөн мэдрэмжийн өгүүлэмж, буддын сургаалыг нэлээд гүн судалсан, дотогшоо хандсан ажиглалт, түүнийгээ танин мэдсэний үндсэн дээр бичигдсэн шинжтэй. Энэ бүтээлийг сэтгэл судлалын болоод философийн үүднээс ч тайлбарлаж болох, оюуны болоод итгэл үнэмшилийн мөн чанарыг эрэлхийлдэг, бодож уншдаг мэдрэмжтэй уншигчдын тухайд бол гүн ухааны сэтгэлгээнд нөлөөлөхүйц бүтээл гэж хэлмээр байна.
Хүн төрөлхтөн материаллаг зүйл, эд баялгийг шүтсэн эрин зуунуудыг үдэж, бодол сэтгэл, сэтгэцийн гүн нууц руу хөтөлсөн оюунлиг эрин рүү шилжиж буйн шинж гэж болно. Ийн шинэ эрины сэтгэл оюуны эрэлхийлэл, өнөөгийн уншигчдын хүсэн хүлээдэг сэдвийг хөндөж сэтгэлийн гүн рүү чиглэсэн эл бүтээл нь өнөөдрийн Монголын уран зохиолын туурвил зүй дэх ололт, шинэ үзэгдэл гэж хэлэх байна.
МУИС, МХСС 2013 оны 4-р сарын 4. Улаанбаатар
Ашигласан материал:
[1] Ryuho Okawa, Ten Princeples of Unversal Wisdom, 2005, х-60
[2] http://www.freudfile.org/psychoanalysis/dream_interpretation_and.html
[3] http://www.freudfile.org/psychoanalysis/dream_interpretation_and.html
[4]http://royallib.ru/read/freyd_zigmund/vvedenie_v_psihoanaliz_lektsii_1_15_chast_1_2.html#0
[5]http://www.psychology.mn/
[6] Владимир Логинов: Кармический сонник, сны которые менеят жизнь, Санкт Петербург, 2001, х-8,
[7] http://oyc.yale.edu/transcript/462/engl-300
[8]http://oyc.yale.edu/transcript/462/engl-300
[9] http://oyc.yale.edu/transcript/462/engl-300
[10] http://oyc.yale.edu/transcript/462/engl-300
[11] Г.Аюурзана, Шүгдэн, 2012, х-13
[12] Г.Аюурзана, Шүгдэн, 2012, х-73
[13] Д.Галбаатар, Уранзохиол: онол түүх шүүмж, 2012, УБ, х-120
[14] Г.Аюурзана, Шүгдэн, 2012, х-132
[15] Ц.Нацагдорж, Ш.Агваандондов: элдэв ёр зөнг шинжин тайлах судар,1996, х-44
[16] Г.Аюурзана, Шүгдэн, 2012, х-260
[17]http://royallib.ru/read/freyd_zigmund/vvedenie_v_psihoanaliz_lektsii_1_15_chast_1_2.html#0, [28
[18] http://royallib.ru/read/freyd_zigmund/ психоанализ (Лекции 1-15, часть 1, 2)
[19] http://oyc.yale.edu/transcript/462/engl-300
Pasted from <https://otgoojargal.wordpress.com/?p=117&preview=true&preview_id=117&preview_nonce=>